Šeść filmaŭ pra Płošču-2010

Minuła čatyry hady paśla dramatyčnaj Płoščy-2010. "Radyjo Svaboda" padabrała najbolš jaskravyja filmy, u jakich pakazvajucca padziei toj vybarčaj kampanii i jaje brutalnaha zaviaršeńnia.

«Biełaruskaja mara» — pieršy film pra Płošču

Premjera prajšła ŭ Miensku 6.10.2011. Jahonaja aŭtarka — žurnalistka Kaciaryna Kibalčyč.

U filmie raspaviadajecca historyja žyćcia maładoha čałavieka ź Miensku, jaki apošnija 18 hadoŭ žyvie ŭ krainie «apošniaha dyktatara Eŭropy». U asnovu filma lahli padziei 2010--2011 hadoŭ u Biełarusi: prezydenckaja kampanija, represii, sudy i toje, jak heta adbiłasia na žyćci samaj «stabilnaj» postsavieckaj respubliki.

«Biełaruskaja mara» — apaviadańnie pra toje, jak režym moža złamać čałavieka. I pra toje, jak u dziaržavie z tatalnym kantrolem možna być ščaślivym, niahledziačy ni na što.

Davoli! Da Voli...

Dakumentalny film Andreja Kuciły i Viačasłava Rakickaha. 55 chv., Biełaruś, 2011 hod. Telekanał Biełsat.

Film pryśviečany ŭhodkam dramatyčnych padziejaŭ u Biełarusi ŭ śniežni 2010 hodu, kali była luta razahnanaja mirnaja akcyja pratestu suprać falsyfikacyi prezydenckich vybaraŭ. Śledčaja, sudovaja i turemnaja systemy - vačyma ŭdzielnikaŭ taho pratestu, jakija prajšli praź piekła turmaŭ. Aŭtary zasiarodžvajuć uvahu na ŭśviedamleńniach ludziej, jakija stracili pracu, vučobu, pieražyli žorstkija fizyčnyja i maralnyja katavańni.

Žyvie Biełaruś!

Mastacki film (aficyjny hod vydańnie 2013) apaviadaje pra padziei ŭ Biełarusi pierad Płoščaj-2010. Maładoha rok-muzyku Mirona Zacharku zabirajuć u vojska, a hurt traplaje ŭ čornyja śpisy. U vojsku jon pačynaje vieści dziońnik u internecie, dzie apisvaje dziedaŭščynu i ŭmovy słužby. Dziońnik pierarastaje ŭ adkrytaje supraćstajańnie z režymam. Film zdymaŭsia ŭ listapadzie-śniežni 2011 hodu ŭ Polščy. Adnak Ambasada Biełarusi ŭ Polščy rezka asudziła film i zaklikała nie pakazvać u kinateatrach. Muzyku da filmu napisaŭ Lavon Volski. Aktoru Anatolu Katu za ŭdzieł u filmu skasavali kantrakt na dziaržaŭnaj kinastudyi «Biełaruśfilm».

Dajści da Płoščy

rež. Halina Samojłava, 2011 h., Biełaruś. Telekanał Biełsat.

Napiaredadni prezydenckich vybaraŭ biełarusy žyli ŭ čakańni važnych stanoŭčych źmienaŭ u svajoj krainie. Ź vieraju ŭ realnuju mahčymaść demakratyčnych pieramienaŭ praz vybary pryjšli jany na płošču Niezaležnaści. Usio heta było «pierad»... Apoviedy ŭdzielnikaŭ padziejaŭ na Płoščy pakazali cynizm i chłuślivaść dyktatury, jakaja, vykarystoŭvajučy brutalnyja metady, źniščyła nadziei na pieramieny da lepšaha. I ŭ žyćci biełaruskaha narodu pačaŭsia peryjad «paśla». Aŭtary filmu pakazali, jak adbyvaŭsia pierałom dumak u hety čas. Adnoju z najvažniejšych postaciaŭ tych padziejaŭ byŭ kandydat na prezydenta Biełarusi Uładzimir Niaklajeŭ.

Pastka dla apazycyi. 

Dzień 19 sniežnia 2010 h. pakinuŭ pa sabie šmat skandalnych tajamnicaŭ. Centralnaja versija filmu: padziei 19 śniežnia – heta manipulacyi Maskvy, jakaja spravakavała taki scenar i adzinaja ŭ vyniku vyjhrała. Pryčym užo nia pieršy raz u najnoŭšaj historyi. Dziela paraŭnańnia ŭ filmie pakazanyja padziei z časoŭ referendumu 1996 h., u vyniku jakoha źmianili Kanstytucyju i razahnali demakratyčna abrany Viarchoŭny Saviet. Pavodle słovaŭ Leanida Mindlina, rasiejski śled – heta tolki versija: «Dokazaŭ niama, ale jość lohika padziejaŭ».

2011, Biełaruś. Telekanał Biełsat.

Žalezam pa škle

Film maje apraŭdać dziejańni ŭładaŭ u razhonie Płoščy, razhromie i zastrašvańni apazycyi. Film daje mahčymaść acanić, nakolki šmat ludziej hatovyja byli padtrymać radykalny plan skidańnia režymu. Z kadraŭ paŭstaje spantannaja aktyŭnaść demanstrantaŭ, adnak dokazaŭ pracy najomnikaŭ i bajevikoŭ padčas Płoščy prademanstravana nie było.

Krynica